Родом из Неба
Помяни, Господи, иже в девстве, и благоговении, и постничестве, и в чистем жительстве пребывающих.
Помяни, Господи, всякое начало и власть, и иже в палате братию нашу, и все воинство.
Даруй им глубокий и неотъемлемый мир, возглаголи в сердцах их благая о Церкви Твоей и всех людех Твоих,
да в тишине их тихое и безмолвное житие поживем во всяком благочестии и чистоте.
Благия во благости соблюди, лукавыя благи сотвори благостию Твоею.
Помяни, Господи, предстоящыя люди и ради благословных вин оставльшихся и помилуй их и нас, по множеству милости Твоея:
сокровища их исполни всякаго блага:
супружества их в мире и единомыслии соблюди:
младенцы воспитай, юность настави, старость поддержи, малодушныя утеши, расточенныя собери, прельщенныя обрати и совокупи Святей Твоей Соборней и Апостольстей Церкви:
стужаемыя от духов нечистых свободи, плавающым сплавай, путешествующым сшествуй, вдовицам предстани, сирых защити, плененныя избави, недугующыя исцели.
На судищи, и в рудах, и в заточениих, и в горьких работах, и всякой скорби, и нужде, и обстоянии сущих помяни, Боже.
И всех требующих великаго Твоего благоутробия, и любящих нас, и ненавидищих, и заповедавших нам, недостойным, молитися о них, и вся люди Твоя помяни, Господи Боже наш, и на вся излей богатую Твою милость, всем подая яже ко спасению прошения.
И ихже мы не помянухом, неведением, или забвением, или множеством имен Сам помяни, Боже, ведый коегождо возраст и именование, ведый коегождо от утробы матере его.
Ты бо еси, Господи, помощь безпомощным,
надежда - безнадежным,
обуреваемым - Спаситель,
плавающым - пристанище,
недугующым - Врач.
Сам всем вся буди, ведый коегождо, и прошение его, дом, и потребу его.
